اشكالولك علية

--------------------------------------------------------------------------------

اشكالولك علية وصار وجهك سيف

وتعرفني التكتلك والحجي امصدكة

شجرة ومو بدية وتدري وكتك ريح

وتحملني ذنب من طيحت وركة

خلك ساتر ولك سويت خلكي وياك

اشكد موت وجثث ما ضيجت خلكة

مو من صالحك علجرف تزرع عود

ما تدري اعلة ساعة ايفيض ويغركة

ومن شفت الخناجر خذت دور السيف

كلت يا روح صيري ابهلوكت دركة

وتسألني تكلي اسوة وكتك بيك

شسولفلك شكلك تكتل الحركة

ذبني ابير بيدة وكال اكلني الذيب

ورسم للذيب صورة وجثتي ابحلكة

وطفاني وعلجمر بجفوفة رش الماي

ورد ينفخ رمادي ويا جمر يلكة

ما يدري الوكت لو عجز هدة خيل

اليطيح ابدربهة اجدامهة اتسحكة

وذبحني امناطرك غيمة ومطرهة ايطيح

كضت شوغات روحي اللهفة الملكة

مثل فزة امفارك من تجيني ابطيف

اشبكنك وافز بس كلشي ما الكة

مو ذنبي ترة البعض البشر ما الوك

لأن طبعي صريح وراسي ما دنكة

اللؤلؤ باللظم كلش جميل ايصير

بس هو الحجي عالركبة التعلكة

كرسبو العراقي