ليش الغدر جسمك منتشر بيه
وكلبي لاتكل صافي منته شر بيه
طرف صبعك حبيبي من تشر بيه
كره واحقاد امطاره عليه
شبيهك بالحواري العين .. يندار
ولجدامك فرشت الروح .. يندار
نذر عمري اعله عمرك كون .. يندار
وشكو عندك علل تندار بيه
شبده مني وتركت بساع ودك
ولو ادري بعذاب الگلب ودك
اعتب عالزمان اللي عَلَيّ وداك
اختارك وكح حتى تخون بيه
اكتبلي شما اردت تكتب واردلك
بساتين بوسط گلبي ورد .لك
اروح وابتعد وازعل واردلك
لأن الگلب بيدك مو بديـــه
گلبي انت ملكته وانت حر بيه
عليل ودواه عندك وانت حر بيه
ويا كاس السم اجرعه وانتحر بيه
ولا غيرك يمس اطراف اديه
عليك الحال ما ظل حال بعدك
وعليك الدمع خالص نزف بعدك
اجاني الموت وانت بهجر بعدك
تحب الموت اظن انت اليـــــه
سجاجينك بنص حشاي / لاحن
وعزف عود بدليلي الـــــك / لاحن
شنو گلبك صخـر .؟ لا سئل / لاحن
وانه كلبي نترس ضيم واذيـــه
يدهري الكَــــــلب ايس مره مني
وكَصني إسهام هجرك من رمني
أكَول السبــــــــــب منك مره مني
وحرت ياهو سبب هالصار بيه
مهموم الكَلب بي جرح بي داي
واتيهن لو مشيت باثـــر بيداي
من اوصل البابك وادكَ بيداي
احس الباب هوه ايدكَ عليه
قلبي مافرح عقـــــــــــبك ولاسار
ولاجذمي ماخطى الغيرك ولاسار
أخبرك مابقت جـــــــــلمه ولاسار
فضحني الدمع من غصـــبن عليه
موضوع: ابوذيه 
الأربعاء أكتوبر 07, 2009 4:13 am
