**** الاصــــدقـــــاء *** قصيـــدة اكثــر من رائعة

*** الاصـدقــاء***

للمبدع ** نائل المظفر

موكلمن فتحلك بابة يهواك
ولا كلمن يكرهك بابة ينسد

اكو مسدود بابة وكلبة مفتوح
واكو مفتوح بابة وكلبة اسود

اذا طشيت صحبانك على الماي
اثكلهم وفة الجواك يركد

واخففهم يظل طافح على الرك
يروح وية الجزر ويرجعة المد

اذا محتار سافر تعرف الناس
منو يزت القطار ويوكف ازيد

اكو اشدة بحبل ويكطعة ويروح
واكو بكلمة شرف عل السجة ينشد

واكو بمشية قطارك عينة تحتار
وباللحظة الاخيرة وياك يصعد

واكو يشيل المحطة وية القطارات
ويدكهة اعلة كلبة وصدرة ينسد

فرق – فرق بين اليعبدك بالمحطات
وفرق بين البناك بكلبة معبد

لا تامن بشر من طينة مخلوق
بس اربعطعش طينة محمد

مو كلمن ضحكلك منة ترتاح
ترة ناب الضبع كل ضحكة ينحد

ولا تحقد علة كلمن يبجيك
اذا دمعك طفح صدكني تبرد

البشر دلة ويفوح بداخلة الضيم
اذا يطفح دمع نيرانة تخمد

ولا تحقد علة الصعدو بلة اجناح
معروف الصكر لو جنحة ينشد

ومو كلمن نزل يسمة مذلول
ولا كلمن صعد يسمة امجد

اكو صاعد رغم ماهوة عل الكاع
واكو نازل يضل لو قمة يصعد

راسك منتصب اعلة من اليدين
بس من السهل تتناوشة اليد

اذا عندك جبل خلهم يصعدون
فرق بين الصعد والراد يصعد

اكو يهد الجبل لو هد الجفوف
واكو يهدّ الجبل لو جفة ينهد

على المبرد كفر تنغر السيوف
لان سيف علة سيف بكلبة ينحد

واذا عدهم رحل كلهم يخسرون
شنو الي بهالسيف وبلية مبرد

وما يرحل جذب وخاف يهمون
ويظل السيف تالي بكصبة ينصد

اذا تعزف لحن ويدكلك انسان
لاتكطع كمانة صعب ينشد

مرات اللحن ما يطرب الناس
ومرات البشر ذاناتة تنسد

ومرات اللحن تطربلة طرشان
بس طبع اليسمعك زور يشهد

على البلبل يكلك منكر الصوت
واذا ينهك حمارة يصيح غرد

اذا حجيك حكم وتخاطب الناس
كل راس علة كدة وياك ينشد

لان روس البشر عكس الفراغات
كلما تنترس تستوعب ازيد

واذا تحجي ويرد صوتك كما كان
يعني اليستمع فارغ مجرد

صوتك مايردة الراسة متروس
لان بس بالفراغ الصوت يرتد

واذا ضيمك كبر لا تحجي بالعين
وتشوف الدنية كلهة بلون اسود

منو بهذا الوكت ما غيرة الضيم
حتة بيوم الاحد ماكو احد

لكن لا تضل تحسب توابيت
انة كبلك علي صب اسود العد

ارفعت راسي وكمت احسب بالاعراس
على خشم السواد الابيض امتد

ولو غني الطفل من شفتة بالعيد
يشل بجروح ثوبة ودمعة عل الخد

بس اني افرحت جي جت الاطفال
ومسح كل الدموع وراح عيد

علمنة الطفل يصبر علة الضيم
وطلع منة الطفل ايمانة ازيد

اريد اطرح قضية وانتم اسلام
واريد اسأل جمعكم واطلب الرد

بنيتو شكد معابد كلهة عل الكاع
منو البيكم بنالة بكلبة معبد

ماكولن كفر ولا قلة ايمان
لكن مهزلة وما الهة احد

لتلاثة الملاهي امفتحة بالليل
وبالعشرة الجوامع كلهة تنسد