قصيدة ضمني بليل
--------------------------------------------------------------------------------
قصيدة اكثر من رائعة للمبدع الشاعر الكبير عريان السيد خلف
ضمني بليل ثاني وحل حلال الخل
شحيحه افراخنه ودكانهه معزل
البسمه نبوكهه من الاه والياويل
وصياد الهموم بدفتره يسجل
ياكلبي شبع ومعكرات الكيف
زمن توزهن ما اضن بعد تحمل
يولنك ضواري مهذبات الناب
لامخلص يعينك لو ردت تجفل
يا مشاجج زمانك حد كطاع النيط
تترجه الشفه وشكواك سل السل
لاعاد الصبر يلجم مصب العين
ولا مثل الخلك بدموعنه نمثل
ولاذيج المضايف عاجده الديوان
ولا سربه وذن برياضهن تصهل
ولا شارب يرف لو مطكت ام عريف
ولا شكره جعد بوجوهنه تهلهل
ولامدرع فشك ينحر صدور الكوم
وما بين اللميض يحول تحول
ولاصاحب ذرب يوجد الماذيك
يبسط خاطره وفوك الجرح ينزل
مصخت والضماير غبراهه الغيض
وامتد الدرب وام الفرح مثجل
وطالت والعمر كلما تلف بي يطول
غم ذاك العمر من ينكضي تعلعل
شي عاشت لفو وتروم هذا وذاك
وشي كضت عمرهه بنعم وتوسل
وشي حربه مواسم تنبت بكل كيف
شما بدل وكتهه لحالهه تبدل
وشي تلهث عمر تجمع ورق وارقام
لحد كطع النفس وبمالهه تنعثل
مناحر والخلك ما تعرف المعروف
ماخذهه الطمع وبلا سبب تكتل
ما اني من ارد اسولف واكشف المغلوك
يغدي الحك صبر وحجايتي تزعل
يالشعرك مليل حل حلال الخل
وطول واهسك للواهسه مخيل
اسلم من عذاب الاه والياويل
وعللني بهواك العافيه تعلل
يالتالي العمر جل العمر عيسوب
فوك مروز روحي الزور صاير جل
مدنف فوك وكري بطارف الصعبات
وصكور الروابي العاليه تزبل
مشكلتي الفرح ما اعرف بابه منين
وبلون الحزن من زغري متمشكل
ناورني الدمع باول مدب عالكاع
وناغمني الحزن وي رنه الجنجل
ضميت الصداكه لساعه الكلفات
وحرزت الذخر لن جودهه موشل
دحل شعرك حبيبي الليل باجي يطول
لاخيط الفجر يتعجل من ايهل
موضوع: قصيدة اكثر من رائعة للمبدع الشاعر الكبير عريان السيد خلف 
الأربعاء أكتوبر 21, 2009 8:24 am
