سلسله مذكرات رحله نجاح فنان ...... بقلم عاشق "الجزء الثالث"

بسم الله الرحمن الرحيم
مجله الرابطه


[وحشتوني اوي يا احلي ملايكه ربنا بعتهم ليا علشان يدافعوا عني ....انا عايز اقولكوا ان مهما احاول اوصف اد ايه حبي ليكوا وغلاوتكوا عندي مش هلاقي كلام ربنا ميحرمنيش منكوا ابدا يا اغلي حاجه عندي
المره اللي فاتت وصلنا لاول خطوه في المشوار ان هنبدا نجهز الالبوم حب ولفيلم حاله حب والاتنن كان بيتم التجهيز ليهم في نفس الوقت
رزان كانت مرشحه لدور البطوله في الفيلم بدل من زينه وبعد كده اعتزرت وجيه مكانها زينه في الوقت ده كان الفيلم عليه خلافات كتيره وكنت مخنوق اوي الفتره دي من كتر المشاكل
اولها..... التصوير اتاجل اكتر من مره بسبب ظروف انتاجيه
وتاني مشكله.....كانت علي الافيش وده كان اول فيلم ليا وكان الافيش ولا عليه صوره ليا ولا حتي اسم وكان افيش مش معبر خالص وبعد كده عدله الافيش بصوره صغيره ليا
وبعد كده حصل خلاف تاني مع احمد الدسوقي لان حقي الادبي في كتابه قصه الفيلم الشركه المنتجه
اتجاهلته خالص ده غير حقي المادي من اول ما كتبت القصه واجري في الفيلم والاغنين "عيونه دار - وهي ايه الحياه" سجلتهم علي حسابي الفتره دي كنت تعبان فيها جامد
انا مكنش فارق الفلوس بس التجاهل احساس وحش
بعد كده طلب مني احمد الدسوقي وقف الشكوي اللي انا قدمتها في غرفه صناعه السينما لحد ما يتم
تعديل الافيش واشوفه وانه هيكون مرضي ليا
ده غير الوعود الكتير اللي اتوعدتها في الفيلم ومتنفذش منها ولا حاجه وكان عندي حاجات كتيره عايز اقدمها بس للاسف محصلتش ولو كنت عملتها كان الفيلم هيبقي احلي
وكمان وقت التصوير كنت زعلان من اللي حصل بس الحمد لله اتعلمت من التجربه دي كتير اوي ساعدني في حياتي بعد كده
رغم كل الخلافات الا ان حاله حب فضل محتل المركز الاول في افلام العيد من خلال الايراداتوكانت الايرادات كاول فيلم ليا مبشره وكمان النقاد اشادوا بيا في الفيلم ده
ومن ضمن المواقف الصعبه اللي حصلت في الفيلم واحنا بنصور ان كان فيه مشهد انا علي الموتوسيكل وبجري بيه بسرعه وبعدي من تحت الكاميرا ومعدات ثقيله المفروض كانت تترفع وقت ما انا هعدي بس
من تقلها مترفعتش ونزلت راسي بس برضه خبطت فيها لكن ربنا ستر متقلقوش انا سليم اهو الحمد لله
في نفس الوقت ده عرفت ان احمد ذكي الله يرحمه ابتدي يتعب جامد وقررت اعمله اغنيه علشان يعرف اننا بنحس بيه وقررت ادعيله فيها زي ما هو دعالي وانا صغير كان عندي 17 سنه
اه وانا صغير اصل زمان قابلته صدفه وقولتله انا بغني ممكن تسمعني وسمعني فعلا بعد
ما غنيتله وقالي "انت هيكون ليك مستقبل باهر واني مياسش وربنا معايا"
ومن وقتها قررت اني بفضل ربنا وعدم الياس هوصل
وبعد الاغنيه وبعد انتهاء حاله حب اخدت اوسكار احسن ممثل من جمعيه فن السينما
ونجوم اف ام اخدت منها جايزه احسن مطرب كامتداد لعمرو دياب
وبما ان سيره عمرو دياب جت انا بقولها اهو انا معنديش خلافات شخصيه معاه
وبلاش فبركه الصحافه لكلامي وكلامه اللي بيحاوله يوقعوا بنا بيه
بعد كده جالي فتره احباط لان البوم حب اتاخر نزوله بس مكنش التاخير مني
ظروف الشركه كانت كده وان في ناس كانت لازم البوماتها تنزل قبل البومي

وبعد فتره نزل البوم حب وصورنا منه قرب حبيبي
وكانت مختلفه خالص عن حبيبي وانت بعيد وده كان لازم علشان اقدم اشكال مختلفه لجمهوري
وحبايب قلبي اللي هو انتوا ونجح الالبوم وحاولت اقدم فيه كلمات جديده ومزيكا جديده وجزء من الافكار الكتير اللي علي طول بتحصرني في دماغي
وفي نفس الوقت الاشاعات مسبتنيش في حالي بعد ما قالوا ان انا وشيرين متجوزين وعندنا ولد اسمه احمد كمان ...... قالوا برضه ان في علاقه عاطفيه بيني وبين رزان
ومره بيني وبين زينه وشويه دنيا سمير غانم وطبعا دلوقتي الاشاعه مع مين
وقبلها نيكول سابا وناس من بره الوسط وناس من الوسط وانا اصلا زهقت لان الاشاعات دي سخيفه رغم ان قولتها مليون مره "انا مش هتجوز فنانه" نفسي بقي الصحافه تبعد عني ومش تقليل منهم بس
"مراتي ليا لوحدي ومش هسمح لها تخالط رجاله تانيه"
تمام كده
وفي نهايه سنه 2004 حصلت علي جوايز من استفتاءات كتيره منها:
احسن مطرب مثل لاول مره
من احسن الالحان لحن قرب حبيبي اللي اتهموني فيه ان انا سرقوا وده محصلش
2003و2004 كانوا من اصعب سنين في بدايه المشوار حصل فيهم احباطات كتير بس الحمد لله كله عدي
كفايا كده بقي انهارده علشان متزهقوش مني مع اني عارف ان عمركوا متزهقوا مني
وبوعدكوا ان شاء الله هرجعلكوا تاني في الصفحه الرابعه من المذكرات قريب
ووعد مني اول ما افضي بس من الشغل اللي عندي هتلاقوني اون لاين معاكوا ووقتي كله هيبقي ليكوا
بس انتوا شايفين القلق واللخبطه اللي في الدنيا اليومين دول
واحنا مصرين بجد